SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jas dóretiwshiniń tuńǵısh kitabınıń prezentaciyası bolıp ótti

Ádebiy dóretiwshiligi hám máripat jolındaǵı iskerligi menen tanılǵan Abdulhamid Sholpannıń «Ádebiyat jasasa - millet jasaydı» degen ájayip sózleri ádebiyattıń millet turmısındaǵı ornı hám áhmiyetin tereń ańlatadı. Prezidentimiz de “Ádebiyat - xalıqtıń júregi” dep biykarǵa atap ótpegen. Sol sebepli, búgingi kúnde mámleketimizde jas qábilet iyelerin anıqlaw, olar menen birge jumıs alıp barıw, qábiletin júzege shıǵarıwı ushın hár tárepleme járdem beriw boyınsha bir qatar unamlı jumıslar ámelge asırılıp kelinbekte. Ásirese, jas qábilet iyelerin qollap-quwatlaw hám xoshametlew maqsetinde olardıń kitapları baspadan shıǵarılıp, prezentaciyaları ótkerilip atır.
Atap aytqanda, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Birinshi kitabım» atamasında zooinjeneriya qánigeliginiń pitkeriwshi kurs studenti B.Kalievtiń kitap prezentaciyası keshesi ótkerildi.
Ádebiy keshede Qaraqalpaqstan xalıq jazıwshısı, filologiya ilimleri kandidatı A.Abdiyev, Málimleme xızmeti basshısı Z.Xojamuratova hám «Zooinjeneriya» kafedrası baslıǵı X.Mamatov hám de ádebiyatqa qızıǵatuǵın student-jaslar qatnastı. Ilájda sózge shıqqanlar, kún qaharmanın dóretiwshilikke óziniń dáslepki adımların qoyǵanı menen qutlıqlap, iygilikli tileklerin bildirdi.
Keshe dawamında tiykarǵı itibar jas dóretiwshi B.Kalievtiń dáslepki kitabı - «Óz ertegińdi jaz» atlı proza jónelisindegi kitap prezentaciyasına qaratıldı. Kitap, óziniń turmıstan alınǵan tórt tiykarǵı paziyletleri menen ózgeshe áhmiyetke iye boldı: ilhám, ǵayrat, pák sezimler hám gúres. B.Kalievtiń dóretiwshilik jolı jańa bolsa da, keleshekte ádebiyat qazanında qaynap, óz ornın tabıwına isenemiz. Onıń kitabı ádebiyatqa da, jaslardıń dúnyaǵa kóz qarasına da unamlı tásir etiwi múmkin. Ol óz kitabında ózi kórgen hám sezingen waqıyalardı anıq hám tásirli tariyplewge háreket qılǵan. Bul, óz gezeginde, jas dóretiwshilerge yosh beriwge, olardıń dóretiwshilik umtılıw-háreketlerine kómeklesiwge múmkinshilik jaratıp beredi.
— Jaslardıń ádebiyatqa qızıǵıwshılıǵına itibar qaratıw hár bir jas dóretiwshiniń qádirleniwi hám oǵan dóretiwshilik ilhám beriwdi ańlatadı. Men B.Kalievtiń kitabı - bul haqıyqıy jas jazıwshınıń birinshi qádemi, hám ol úlken jetiskenliklerdiń baslanıwı dep táriyplegen bolar edim — deydi Qaraqalpaqstan xalıq jazıwshısı A. Abdiyev — «Óz ertegińdi jaz» kitabında biz ushıratıp júrgen hám itibar bermeytuǵın, ápiwayı, biraq anıq hám turmıslıq haqıyqatlar bayan etilgen. Jaslardıń dóretiwshilik baǵdarındaǵı tabısları júdá áhmiyetli bolıp tabıladı, sebebi olar jámiyettiń sociallıq hám mádeniy rawajlanıwına úles qosıp atırǵan jaslar bolıp, keleshekte olar ádebiy ortalıqtı jańa hám jetilisken basqıshqa alıp shıǵıwı múmkin.
B.Kaliev avtorlıǵındaǵı kitap júdá tásirli hám jaslardıń sezimlerin ashıp beriwge qaratılǵanlıǵı menen de qızıqlı boldı.
lájda jas dóretiwshige unamlı pikirler bildirildi, onıń keleshektegi dóretiwshilik jumıslarına áwmetler tilenip, maqsetlerine qaray talpınıwına kúshli motivaciya berildi. Sonıń menen birge, onıń eń belsendi studentler qatarında ekenligi ayrıqsha atap ótilip, erisip kiyatırǵan jetiskenlikleri aytıldı.
Topar basshısı A.Nametov basshılıǵında gruppalas dosları kún qaharmanın qutlıqlap, estelik sawǵaların tapsırdı. Bunday qollap-quwatlawlar álbette jas dóretiwshiniń ádebiyatqa qızıǵıwshılıǵın jáne de artırrıp dóretiwshilik jolına jańa qádemler qoyıwına elede túrki boladı dep oylaymız.
Maǵlıwmat ornında, B.Kalievtiń «Óz ertegińdi jaz» kitabı 100 nusqada basıp shıǵarıldı. Bunnan aldın filialdıń 3-kurs studenti Sardar Bababoyevtıń «Kókdala tańı» hám de 4-kurs studenti I.Tursınbaevanıń «Ijodim debochasi» atlı kitapları baspadan shıǵarılǵan edi. Bul óz ornında filialda veterinariya hám zooinjeneriya baǵdarında oqıp atırǵan jaslarǵa dóretiwshilik penen shuǵıllanıwı ushın keń múmkinshilikler jaratıp berilip atırǵanlıǵı hám hár tárepleme qollap -quwatlanıp atırǵanın tastıyıqlaydı. Óytkeni, Belgili jazıwshı Shingiz Aytmatovıtń da qánigeligi de zootexniya bolǵan.