SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jas veterinarlardıń kásiplik bilimleri bekkemlenip atır

«Veterinariya medicinası hám farmakologiyası» kafedrasınıń «Jas veterinarlar» dógeregi aǵzaları ushın «Jabayı hám úy haywanlarına kiriwshi taq tuyaqlılar gelmintozları diagnostikası» temasında sabaq shınıǵıwları ótkerildi. Shınıǵıwlar filial laboratoriyasında alıp barıldı. Ótkerilgen sabaq shınıǵıwlarınıń tiykarǵı maqseti jas veterinarlarǵa jabayı hám úy haywanlarına kiriwshi taq tuyaqlılar gelmintozları haqqındaǵı túsiniklerdi keńeytiw, olardıń diagnostikası hám emlew usılları boyınsha bilimlerdi bekkemlew bolıp tabıladı.

Gelmintozlar - bul haywanlardıń isheklerinde hár qıylı parazitlerdiń jasawı nátiyjesinde júzege keletuǵın kesellikler bolıp, olar haywanlardıń salamatlıǵın hám nátiyjeliligin sezilerli dárejede kemeytedi. Sol sebepli, bul temadaǵı bilimler veterinariya tarawındaǵı hár bir jas qánige ushın áhmiyetke iye bolıp tabıladı. Shınıǵıwlarda jabayı hám haywanlarına kiriwshi taq tuyaqlılar gelmintozlarınıń túrleri, olardı anıqlaw usılları, emlew hám profilaktika qılıw metodikasına tiyisli teoriyalıq hám ámeliyattaǵı áhmiyetli táreplerine toqtalıp ótildi.

Student-jaslarǵa anıq hám túsinikli tárizde parazitlerdiń túrleri, olardıń organizmdegi ómir súriw dáwiri, infekciyalardıń jolları hám olardı emlewde qollanılatuǵın dári ónimleri haqqında keń túsinikler berdi. Sonıń menen birge, jabayı hám haywanlarına kiriwshi taq tuyaqlılar gelmintozlarınıń diagnostikasındaǵı zamanagóy usıllar da kórip shıǵıldı. Jas veterinarlar menen laboratoriyada parazitlerdi anıqlawdıń zamanagóy usılları hám medicinalıq úskenelerdi qollaw haqqındaǵı tájiriybeler de bólisildi.
Shınıǵıwdıń nátiyjesi retinde jas veterinarlar gelmintozlardıń diagnostikası hám emlew usılları boyınsha ámeliyattaǵı zárúrli maǵlıwmatlarǵa iye boldı. Bul bilimler olardıń keleshektegi professional iskerliginde áhmiyetke iye bolıp, haywanlardıń salamatlıǵın saqlaw hám olardı zárúr emlew ilájların nátiyjeli qollawda járdem beredi.
«Jabayı hám úy haywanlarına kiriwshi taq tuyaqlılar gelmintozları diagnostikası» temasında ótkerilgen sabaq shınıǵıwları jas veterinarlar ushın zárúr bilimler deregine aylandı. Bul shınıǵıwlar bolajaq jas qánigelerdiń kásiplik tayarlıǵın bekkemlewge hám olardı jańa bilimler menen támiyinlewge qaratılǵan. Veterinariya tarawındaǵı keleshektegi jetiskenliklerdiń tiykarı, álbette, jaslardıń zamanagóy talaplarǵa juwap beretuǵın bilim hám kónlikpelerge ıyelewi bolıp tabıladı. Alıp barılǵan shınıǵıwlar dawamında laboratoriyada tiyisli ámeliy ilájlar kórsetip berildi.