SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial direktorı 1-kurs studentleri menen ashıq sáwbetlesiw ótkerdi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń direktorı, professor Adilbay Esimbetov usı jılda 1-kursqa qabıl etilgen studentler menen ushırastı. Dáslep A.Esimbetov búgingi kúnde elimizde alıp barılıp atırǵan jaslarǵa baylanıslı mámleketlik siyasattı hámde onıń unamlı nátiyjeleri, joqarı bilimlendiriw tarawındaǵı reformalar, student-jaslar ushın jaratıp berilip atırǵan keń múmkinshilikler hám shárt-sharayatlar, olardan únemli paydalanıp, joqarı nátiyjelerge erisip atırǵan jaslar tuwralı óziniń bahalı pikirlerin bildirdi.

Házirgi kúnde filialda ayrıqsha bahalarǵa oqıp, respublikalıq kólemde ótkerilgen tańlaw hám jarıslarda sıylı orınlardı iyelep, filialdıń abıroyın arttırıwda úles qosıp kiyatırǵan jaslardı ayrıqsha atap ótip, studentlik ómirine endi ǵana qádem qoyǵan jaslardı órnek alıwǵa shaqırdı. Ashıq sáwbetlesiw dawamında 1-kurs studentlerine filialdaǵı oqıw hám ruwxıy-aǵartıwshılıq processleri, ishki tártip-intizam haqqında túsinikler berildi.

Sonıń menen birge student-jaslardıń bos waqıtların mazmunlı shólkemlestiriw maqsetinde turaqlı túrde ótkerip barılatuǵın kórik-tańlaw, pán olimpiadaları hámde túrli ilájlarda belsene qatnasıw usınıs etip ótildi. Sáwbetlesiw dawamında studentlerge óz pikir hám usınısların erkin bildiriw imkanı jaratılıp, oalrdıń usınısları tıńlandı. Studentler filial turmısı haqqında tolıq túsiniklerge iye boldı.