SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qazaqstan hám Qıtay Xalıq Respublikasınıń JOOları menen memorandum imzalandı

Usı jıldıń 10-iyul kúni “International hotel Tashkent” miymanxanasında «Jipek jolı awıl xojalıǵı bilimlendiriw hám ilimiy-izertlew innovaciyalıq Alyansı»nıń 9 jıllıq anjumanı bolıp ótpekte. Ilájdı Awıl xojalıǵı ministri I.Abdurahmonov kiris sózi menen ashıp berdi. Iláj sheńberinde 13 sırt mámleketlerdiń abıroylı joqarı oqıw orınlarınan kelgen wákiller óz-ara pikir almasıp, áhmiyetli máselelerdi dodaladı. Anjumanda Awıl xojalıǵı sistemasındaǵı shólkemler hám joqarı oqıw orınları ózleriniń awıl xojalıǵı ónimleri kórgizbeleri menen qatnastı. Sırt elden kelgen miymanlar menen sóylesiwler alıp barıldı. Usı ilájǵa Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı direktorı A.Esimbetov hám ilimiy-pedagogikalıq kadrlar tayarlaw bólimi baslıǵı ilimiy-izertlew bólimi baslıǵı A.Mambetnazarov qatnaspaqta.

Quwanıshlısı, anjuman sheńberinde filial direktorı A.Esimbetov hám Qıtay Xalıq Respublikasınıń Yangling kásip-óner hám texnikalıq kolledjiniń prezidenti Zhong Weizhon hámde Qazaqstan Respublikasınıń Semey qalasındaǵı Shakarim atındaǵı universitetiniń rektorı D.Orınbekov penen birge islesiw boyınsha sóylesiwler alıp barıldı. Kelisim ushırasıwı dawamında Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı hámde Qıtay Xalıq Respublikası, Qazaqstan Respublikasınıń joqarıda atap ótilgen abıroylı joqarı oqıw orınları ortasında birge islesiw memorandumı imzalandı. —Mine usınday áhmiyetli iláj sheńberinde sırt el hám qońsı mámleketlerdiń JOOları menen memorandumlar imzalawǵa eristik —deydi filial direktorı A.Esimbetov— álbette bul hár eki tárep ushın da máp alıp keletuǵın sheriklik boladı dep oylaymız. Anjuman sheńberinde Awıl xojalıǵı sistemasındaǵı joqarı oqıw orınlarınıń wákilleri usınday paydalı birge islesiw baylanısların ornatıwǵa erispekte.