SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Jaslarǵa unamlı tásirlerdi hám girbińsiz arzıwlardı inám etken forum

Samarqand mámleketlik veterinariya medicinası, sharwashılıq hám biotexnologiyalar universitetinde hár jılı ótkeriliwi úrdiske aylanıp úlgergen III Respublikalıq jaslar forumına start berildi. Filial direktorı A.Esimbetov basshılıǵındaǵı delegaciya usı forumda qatnasıw ushın kúni keshe Samarqandqa jetip kelgeni hám miymanlar saltanatlı tárizde kútip alınǵanı haqqında málim etken edik. Búgin bolsa forumdıń saltanatlı ashılıw máresimi bolıp ótti. Onda universitet rektorı, professor X.Yunusov sózge shıǵıp búgin jaslar ushın jaratıp berilip atırǵan talay imkaniyatlar, Joqarı bilimlendiriw tarawında alıp barılıp atırǵan ózgerisler hám girbińsiz arzıwlar eteginen bekkem uslaǵan jaslardıń erisip atırǵan tabısları haqqında toqtaldı. Bunnan soń forumǵa rásmiy tárizde start berilgennen soń, 5 áhmiyetli baslama tiykarında qızıqlı tańlawlar, hár túrli sport jarısları «Debat» hám “Zakovat” intellektual oyınları, «Studentler teatr studiyası» kórik-tańlawı sıyaqlı ilájlar ótkerildi. Shólkemlestirilgen usı tańlawlarda universitet hám onıń Tashkent filialınıń student-jasları texnikum hámde licey oqıwshıları belsene qatnastı.
Filial studentleri awızbirshilik penen ilájlarda qatnasıp, belsenelik kórsetti. Óz umtılıwı hám tırısqaqlıǵı menen sıylı orınlardı qolǵa kirgizdi. Atap aytqanda, Debat» intellektuallıq oyınında ózleriniń tapqırlıǵı hám oratorlıq sheberligin kórsetip, 2-orındı iyelewge miyassar boldı. Sonday-aq, «Studentler teatr studiyası» kórik-tańlawında qábiletli student-jaslarımız jazıwshı Said Ahmadtıń "Ufq" trilogiyası tiykarında sahnalastırılǵan spektakli menen belsene qatnasıp, 2-orındı iyeledi. Studentler óz qábiletlerin júzege shıǵardı. «Quwnaqlar hám ziyrekler" kórik-tańlawında «Tulpar» komandası ekinshi orındı iyeledi. Quwnaq student-jaslar ózleriniń ájayip shıǵıwları menen bárshege kóterińki keypiyat bólisti. "Perspektivalıq joybarlar jaslar názerinde" temasında ótkerilgen startup joybarı tańlawında filial studenti S.Muqimov óz joybarı menen qatnasıp, 1-orınǵa múnásip dep tabıldı. Haqıyqıy jaslar atmosferası jaratıp berilgen III Respublikalıq jaslar forumında sporttıń voleybol túri boyınsha ótkerilgen jarısta filialımız komandasınıń voleybolshıları sıylı birinshi orındı qolǵa kirgizdi. Usı tárizde studentler jarıs hám tańlawlarda belsenelik kórsetip, múnásip orınlardı iyeledi. Tańlaw hám jarıslar óz juwmaǵına jetkennen soń saltanatlı sıylıqlaw máresimi hám pitkeriwshi kurs studentleriniń saltanatlı pitkeriw keshesi ótkerildi. Iláj basında universitet rektorı X.Yusupov sózge shıǵıp, iláj qatnasıwshılarına minnetdarshılıq bildirip, jaqınlasıp kiyatırǵan jaslar bayramı menen qutlıqlap, pitkeriwshilerge haq jol tiledi. Ildáj basında universitet hám filialdıń pitkeriwshi kurs jasları“Veterinar ant»ın qabılladı. Sıylıqlaw máresiminde hámme jeńimpazlar diplom hám bahalı sawǵalar menen sıylıqlandı. Atap aytqanda, bir qatar ilájlarda orın iyelewge erisken filial student-jaslarına sawǵalar tapsırıldı. Iláj qızıqlı koncert baǵdarlaması menen dawam etti.

— Hár jılı ótkerilip kiyatırǵan jaslar forumı bıyıl da joqarı dárejede shólkemlestirildi. Men ózim bul ilájǵa birinshi márte qatnasıp atırman—deydi filial direktorı A.Esimbetov —bizlerge kórsetilgen izzet hám shólkemlestiriwshilik jumıslarına maqtawlar keltirmewdiń ilájı joq. Jaslar ushın haqıyqıy bayram atmosferası jaratıp berildi. Olar menen birge men de ózimdi jastay sezinip, studentlik dáwirlerimdi esime aldım. Bizlerge usınday imkaniyattı inám etkeni ushın universitet rektorı X.Yunusovqa ayrıqsha minnetdarshılıǵımdı bildiremen. Filial student-jasları unamlı tásirler qushaǵında bul kúnlerdi qálbine mórledi.