SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Bilimdan studentler “Zakovat”ta bellesti

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı studentleri arasında iyun ayı “Jaslar aylıǵı” sheńberinde “Zakovat” intellektual oyını ótkerildi. Ilájdı Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ashıp berdi hám bilimdanlarǵa áwmet tilep ótti. Bunnan soń intellektual oyınǵa start berildi. Onda 10 komanda quramında 60 student jas qatnastı.

Qızıqlı sorawlar, janlı emociyalar hám qızǵın básekilerge bay ótken oyında studentler 1-orın bellesti. “Zakovat” intellektual oyını dawamında filial bilimdanlarınıń logikalıq pikirlewi jáne de qáliplesti, túrli tarawlar boyınsha bilimleri sınaqtan ótkerildi. Qızıqlı hám logikalıq sorawlar jámlengen bul oyında student-jaslar ózleriniń intellektuallıq potencialın júzege shıǵardı.

Oyın juwmaǵında eń joqarı balldı toplaǵan «Qarekeń» komandası jeńimpazǵa aylandı. «Region 95» komandası óz ziyrekligi menen ekinshi orınǵa múnásip dep tabıldı. Úshinshi orındı «Aral» komandası iyeledi. Jeńimpaz bolǵan komandalarǵa sıylıqlaw máresiminde diplom hám estelik sawǵaları tapsırıldı. Studentler «Jaslar aylıǵı» sheńberinde ótkerilgen bul “Zakovat” intellektual oyını olarǵa joqarı keypiyat úlesip, zawıq baǵıshlaǵanın atap ótti.