SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qazaqstan JOOları menen birge islesiw dawam etpekte

Bizge belgili, búgingi kúnde joqarı bilimlendiriw sistemasında alıp barılıp atırǵan barlıq reformalardıń túp-tiykarında oqıw processlerin nátiyjeli shólkemlestiriw arqalı básekige shıdamlı kadrlardı tayarlaw, jaslardıń bilimlerin zaman menen say tárizde jańalap barıw sıyaqlı iygilikli maqsetler jatır. Bul baǵdarda sırt el hám qońsılas mámleketlerdiń abıroylı universitetleri menen birge islesiw baylanısların ornatıp, oqıw processine joqarı tájiriybege iye professor-oqıtıwshılardı tartıw da úlken áhmiyetke iye. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında usı jónelis boyınsha nátiyjeli jumıslar ámelge asırılıp kelinbekte.

Búgingi kúnge shekem Qırǵızstan mámleketi hám Qazaqstan Respublikalarınıń “QS World University Rankings” 500 ligine kiretuǵın joqarı oqıw orınları menen óz-ara sheriklik baylanısları ornatılıp, unamlı nátiyjelerge erisilmekte. Atap aytqanda, oqıtıwshılar almasıwı jolǵa qoyılıp, professorlardıń filial student-jaslarına lekciya ótiwi shólkemlestirilip kelinbekte. Búgin filialǵa Muxtar Áwezov atındaǵı Qubla Qazaqstan universitetiniń awıl xojalıǵı ilimleri doktori, professor, akademik J.Parjanov keldi. Miyman dáslep filial basshılları menen ushırasıp, sáwbetlesiw alıp bardı. Óz-ara sóylesiw dawamında filial direktorı A.Esimbetov Qazaqstanlı miymanǵa bul jerde bilim alıp atırǵan studentler ushın jaratılǵan sharayatlar, teoriya hám ámeliyat úylesiwi jaqsı jolǵa qoyılǵanı, sırt el joqarı oqıw orınları menen dúzilgen memorandumlar tiykarında ámelge asırılıp atırǵan nátiyjeli jumıslar haqqında aytıp berdi.

Alıp barılǵan sáwbetlesiw dawamında bekkem birge islesiw baylanısların ornatıw hám keleshekte usı birge islesiw baylanısların hár tárepleme sheriklik tiykarında kúsheytip barıw, ilimiy iskerlik tarawında sheriklikti rawajlandırıw, Qazaqstan hám Qaraqalpaqstannıń awıl xojalıǵındaǵı imkaniyatları menen jaqınnan tanısıw, maǵlıwmat hám tájiriybe almasıw hám usı arqalı student-jaslardıń bilimlerin bunnan bılayda keńeytip barıw haqqında sóz etildi. Hár eki tárep ózleriniń pikir hám usınısların bildirdi. Qazaqstanlı akademik usı hápte dawamında filialdıń «Zooinjeneriya» qánigeliginde bilim alıp atırǵan student-jaslarına sabaq ótedi.