SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

El ardaǵındaǵı dóretiwshiler studentler menen ushırastı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında “Teatr dóretiwshileri jaslar názerinde” atamasında el ardaǵındaǵı dóretiwshiler menen ushırasıw ótkerildi. Dóretiwshilikke baǵıshlanǵan ushırasıw miymanları Berdaq atındaǵı Qaraqalpaq mámleketlik akademiyalıq muzıkalı teatrınıń sheber artistleri, Qaraqalpaqstan xalıq artisti Sapargul Dawletova hámde Qaraqalpaqstan Respublikasına xizmet kórsetken artist Kópjúrsin Allanazarovlar boldı. Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov ilájdı kiris sózi menen ashıp berip, búgingi kúnde mámleketimizde kórkem óner hám mádeniyat tarawına qaratılıp atırǵan ayrıqsha itibar haqqında sóz etti.

Iláj dawamında sheber dóretiwshiler sózge shıǵıp, ózleriniń kórkem óner tarawına kirip keliw tariyxı, teatrdıń dóretiwshilik qazanında qaynaw hám zawıqlı hám mashaqatlı bolǵanın, búgin Prezidentimizdiń baslaması menen usı tarawda júz berip atırǵan ózgerisler hám jańalanıwlar haqqında tolqınlanıp aytıp berdi. —Ómirimdi dóretiwshilikke baǵıshladım hám buǵan hasla ókinbeymen—deydi S.Dawletova—usı kásibim arqalı elge tanıldım, doslar arttırdım, teart sahnasında turıp kóplegen tamashagóylerdiń alǵısın hám mehirin sezine aldım. Eń tiykarǵısı kóp jıllıq miynetim bahalanıp, el ardaǵındaǵı dóretiwshige aylandım. Bir insanǵa bunnan artıq baxıt barma?. Iláj dawamında súyikli hám sheber aktyorlar menen qızıqlı sáwbetlesiw alıp barıldı. Ushırasıw qaharmanları ózleriniń dóretiwshilik iskerligi hám ómiri tuwralı qızıqlı waqıyalar menen bólisti. Student-jaslardıń kórkem óner hám mádeniyat tarawına qızıǵıwshılıǵın jáne de asırıw maqsetinde ótkerilgen ushırasıw olarda júdá úlken tásirlerdi qaldırdı.