SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Qaraqalpaq ádebiyatınıń jarqın juldızlarınıń tuwılǵanına 95 jıl toldı

Usı jıldıń 7-may kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında qaraqalpaq ádebiyatınıń parlaq juldızları I.Yusupov hámde T.Qayıpbergenovtıń tuwılǵanına 95 jıl tolıwı múnásibeti menen «Qaraqalpaq ádebiyatınıń jarqın juldızları» atamasında ádebiy keshe ótkerildi. Usı ilájǵa Qaraqalpaqstan xalıq jazıwshısı, filologiya ilimleriniń kandidatı A.Abdiev, Ózbekstan hám Qaraqalpaqstan Jazıwshılar awqamınıń aǵzası, shayır R.Otarbaev, jas dóretiwshi shayırlar S.Sırǵabaeva hámde A.Ismaylovlar miyman sıpatında qatnastı.

Filial direktorı, professor Adilbay Esimbetov iláj basında shıǵıp sóylep, qaraqalpaq ádebiyatı tariyxında jańa bir betti ashıp, ózlerinen óshpes iz qaldırǵan ullı dóretiwshilerdiń dóretken shıǵarmaları hám qosıqları qálbimizge mórlengenligi hám olardıń aldında hámiyshe tájim etiwimizdi ayrıqsha atap ótti. Bunnan soń A.Abdiev hám R.Otarbaev sózge shıǵıp, eki tuwısqan el ushın ardaqlı bolǵan jazıwshı hám shayırdıń hámmemizge úlgi bola alatuǵın ómir jolı hám bay dóretiwshiligi haqqında aytıp ótti.

Hár eki dóretiwshi de ózbek hám qaraqalpaq xalıqları doslıǵı hám awızbirshiliginiń jırshısı bola alǵanlıǵın, ádebiyatımızda jarqın iz qaldırıp, bahalı shıǵarmalar hám hikmetli qosıqlardıń avtorına aylanǵanlıǵı tuwralı atap ótildi. Keshe dawamında hár bir qaraqalpaq perzentiniń kitap oqıwǵa bolǵan mehiri I.Yusupov hám T.Qayıpbergenovtıń shıǵarmaların oqıw arqalı oyanıp, qáliplesip barıwı, súyikli jazıwshı hám shayırımızdıń bizge qaldırǵan bay ádebiy miyrası jaslardıń mánáwiyatınıń bunnan bılayda joqarılap barıwında úlken áhmiyetke iye ekenligi aytıp ótildi. Keshege kelgen miyman jas dóretiwshi shayırlar hám student-jaslar tárepinen súyikli shayırımız I.Yusupovtıń qálemine tiyisli ájayip qosıqları kámine keltirip oqıp berildi. Qálblerdi ózgeshe tásirlerge bólegen qatarlar júreklerge jetip bardı. Iláj dawamında jazıwshı T.Qayıpbergenov hám shayır I.Yusupov múnásip yad etildi.