SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentler tańlawda awıl xojalıǵı boyınsha jańa joybarlardı ilgeri súrdi

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında “Jaslar hám innovaciyalıq awıl xojalıǵı" atamasındaǵı tańlawdıń filial basqıshı ótkerildi. Awıl xojalıǵı tarawında jaslardıń jańa, kreativ ideyaların qollap-quwatlaw, jańa joybarlardı ámelge asırıwı ushın motivaciya beriw, tarawda jetekshi hám lider jaslar imkaniyat jaratıp beriw maqsetinde shólkemlestirilgen bul tańlaw shın mánisinde student-jaslardı awıl xojalıǵı tarawında innovaciyalıq ideyalardı engiziwge tartadı. Filial student-jasları arasında ótkerilgen tańlawda qatnasıw hám komandalardı bahalap barıw ushın Ózbekstan «Agrar taraw hayalları» birlespesiniń baslıǵı Adiba Axmedjanova hámde Awıl xojalıǵı boyınsha joybarınıń BMShTD joybarınıń úgit-násiyat máseleleri boyınsha xızmetkeri Otabek Eshmatovlar keldi. Iláj basında filial direktorı A.Esimbetov hám A.Axmedjanovalar sózge shıǵıp, ótkerilip atırǵan tańlawdıń student-jaslar ushın qanshelli dárejede áhmiyetli ekenligin atap ótti. Jámi 4 shárt tiykarında ótkerilgen tańlawǵa «Veterinariya hám zooinjeneriya» fakultetinde bilim alıp atırǵan studentlerden dúzilgen 5 komanda qatnastı.

Qatnasıwshılar óz shıǵıwları dawamında awıl xojalıǵı tarawın rawajlandırıwǵa tiyisli joybarlardı ilgeri súrdi. Tóreshiler quramı aǵzaları joybardıń búgingi kúndegi áhmiyeti, ilgeri súrilip atırǵan ideyanıń mazmunına ayrıqsha itibar qarattı. Barlıq komandalar 4 shárt dawamında belsendilik kórsetip, ózleriniń bilim hám qábiletlerin júzege shıǵarıwǵa tırıstı. Unamlı atmosfera jaratılǵan tańlawdıń juwmaqlawshı nátiyjelerine bola, «Zooinjeneriya» kafedrasınıń «Keleshek jasları» komandası 1-orındı iyelep, tańlaw jeńimpazına aylandı.

«Ekonomika hám gumanitar pánler» kafedrasınıń «Jas buxgalterler» komandası ekinshi orındı iyelegen bolsa, "Veterinariya medicinası hám azıq-awqat qáwipsizligi» kafedrasınıń «Keleshek úmitleri» komandası 3-orındı iyelewge eristi. Iláj juwmaǵında A.Axmedjanova iláj atmosferasın sezine alǵanın hám qatnasıwshılardıń talpınısı múnásip bahalanǵanlıǵın ayrıqsha atap ótti. Jaslar hám innovaciyalıq awıl xojalıǵı" tańlawın dástúriy tárizde ótkerip barıwdı jolǵa qoyıw arqalı taraw boyınsha kreativ ideyalardı ilgeri súrip atırǵan jaslardı qollap-quwatlaw hám motivaciya beriw múmkinligin atap ótti. Jeńimpazlarǵa diplom hám sawǵalar tapsırıldı.