SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Filial psixologı respublikalıq ilimiy ámeliy seminarda qatnastı

Usı jıldıń 25-aprel kúni Joqarı bilimlendiriw, ilim hám innovaciyalar ministrligi tárepinen joqarı oqıw orınlarınıń psixologları ushın «Shańaraqtaǵı mashqalalar hám olardıń psixologiyalıq aqıbetleri» temasında respublikalıq ilimiy ámeliy seminarı shólkemlestirildi.

Ferǵana mámleketlik universitetinde ótkerilgen usı seminarda 100 den aslam psixologlar qatnastı. Seminar dawamında qatnasıwshılarǵa jańa jantasıwlar tiykarında jańa bilim hám kónlikpeler berildi. Qızıqlı tárizde alıp barılǵan usı seminarda Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń psixologı Mexriban Allamuratova da qatnasıp qayttı.

– Seminar hámmemizdi bir jerge topladı–deydi M.Allamuratova–shólkemlestiriwshilik jumısları júdá joqarı dárejede alıp barıldı. Kásiplesler menen birgelikte ájayip atmosferanı sezine aldıq. Ámeliy bilimlerimiz jáne de bekkemlendi hám jańa kónlikpelerge iye boldıq.
Psixologlar qatnasıwında shólkemlestirilgen seminar dawamında olarǵa studentler menen jaqınnan sáwbetlesiw alıp barıw hám qalayınsha birge islesiw boyınsha másláhátler berildi. Olarǵa zamanagóy bilim hám kónlikpeler menen birge jańa maǵlıwmatlar inám etildi. Qatnasıwshılar jańa bilim hám unamlı tásirlerge iye boldı. Olarǵa seminar juwmaǵında shólkemlestiriwshiler tárepinen sertifikat tapsırıldı.