SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Tyutorlar basshılıǵındaǵı kitapqumarlar bellesti

Bárshemizge belgili, keyingi jıllarda Prezidentimizdiń baslaması menen jaslar arasında kitapqumarlıqtı keń túrde en jaydırıw maqsetinde túrli tańlaw hám joybarlar ámelge asırılmaqta. Usı baǵdardaǵı ilájlarǵa joqarı oqıw orınlarınıń studentlerin de keń qamtıp alıwǵa ayrıqsha itibar qaratılıp kelinbekte. Usı jıldıń 26-aprel kúni Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında «Jas kitapqumarlar ligası» tańlawı shólkemlestirildi.

Filialda bilim alıp atırǵan student-jaslardıń kitap oqıwǵa bolǵan mehirin jáne de asırıw, ádebiyat boyınsha bilimlerin sınaqtan ótkeriw, olarǵa awızbirshilikte bir komanda bolıp intellektuallıq duelde básekilesiw ushın imkaniyat jaratıw maqsetinde ótkerilgen tańlaw kitapqumar student-jaslardı bir jerge topladı. Tańlaw qatnasıwshıların Qaraqalpaqstan xalıq jazıwshısı, filologiya ilimleri kandidatı A.Abdiev, Qaraqalpaqstan Respublikası Málimleme-kitapxana orayınıń qánigesi G.Ablakimova, Jaslar menen islesiw boyınsha dekan orınbasarı E.Seytmuratovlar ádil túrde bahalap bardı. Qatnasıwshılar shártlerdi bejeriw dawamında ózleriniń bilim hám qábiletlerin júzege shıǵarıwǵa tırıstı.

Báseki hám tartıslarǵa bay tárizde ótken tańlaw juwmaǵında tyutor R.Xojametov basshılıǵında dúzilgen «Ullı millet perzentleri» komandası sıylı birinshi orındı qolǵa kirgizdi. 2-orındı tyutor B.Iskakovtıń student-jaslarınıń «Renessans» komandası iyeledi. Tyutor J.Mambetniyazovtıń «Apollon» komandasına bolsa 3-orın nesip etti. Tańlaw jeńimpazları diplom menen sıylıqlandı hám aqshalay sıylıqlanıwı atap ótildi. Filialdıń kitapqumarlar bellesiwi qızıqlı tárizde alıp barıldı.