SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

"Teatrlar aylıǵı" sheńberinde «Qorqıt ata»spektakli tamasha etildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń professor-oqıtıwshıları hámde student-jasları "Teatrlar aylıǵı» sheńberinde Qaraqalpaq mámleketlik jas tamashagóyler teatrına barıp, «Qorqıt ata» spektaklin tamasha etti. Bizge belgili, «Qorqıt ata» tariyxqa qobızdıń atası, belgili baqsı retinde mórlengen. Onıń atı túrli dereklerde hár túrli atalıp, esteligi ulıǵlanadı.

Murat Begimov avtorlıǵındaǵı bul spektakl Qorqıt ata tuwılǵanınan baslap, dúnyadan ótemen degenge shekemgi ómiri, basınan keshirgenleri tiykarında sahnalastırılǵan. Spektakl dawamında Qorqıt atanıń qobızdı soǵıw processinde perishtelerdiń járdemi kórsetip beriledi. Insan ómiri dawamında iygilikli islerge umtılıp jasawı kerek ekenligi, artınan jaqsı at qaldırıwǵa tırısıwı sıyaqlı ideyalardı ilgeri súrgen spektaklde sheber aktyorlar óz obrazların júdá isenimli túrde atqardı hám tamashagóylerdiń alǵısına miyassar boldı.

— Student-jaslardıń ruwxıylıq oshaǵı bolǵan teatrǵa barıwın shólkemlestirip barıw olardıń keń dúnyaqarasın hám ruwxıylıǵın qáliplestirip barıwda áhmiyetli bolıp tabıladı—deydi Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov. Filial jámááti hám student-jaslar Qorqıt ata» spektakli tuwralı óziniń unamlı pikirlerin bildirdi.