SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Studentler ishki turizmdi rawajlandırıwǵa úles qostı

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń 1-kurs 101 hám 102-topar studentleri «Ekonomika hám gumanitar pánler» kafedrasınıń tariyx páni oqıtıwshısı E.Seytmuratov basshılıǵında Xojeli qalasındaǵı  Mizdaxqan tariyxıy kompleksine sayaxat qıldı. «Ózbekstan boylap sayaxat et!» ishki turizmdi rawajlandırıw baǵdarlaması sheńberinde shólkemlestirilgen  usı sayaxat dawamında túrli mámleketlerden sırt el turistleri kelip kórip atırǵan arxeologiyalıq esteliklerden biri bolıp sanalatuǵın  Mizdaxqan tariyxıy kompleksi haqqında tolıq maǵlıwmatlar berip ótildi.
—Student-jaslardı qalamızdıń dıqqatqa ılayıq tariyxıy orınları menen jaqınnan tanıstırıw, olar menen birgelikte usı orınlardı  zıyarat qılıp olarda anıq túsiniklerdi oyatıw maqsetinde shólkemlestirgen sayaxatımız olarǵa júdá unadı deydi E.Seytmuratov— usı sıyaqlı mádeniy hám aǵartıwshılıq ilájlardı shólkemlestiriw arqalı jaslarımızdıń qálbinde tariyxıy esteliklerimiz hám mádeniyatımızǵa bolǵan húrmetin jáne de asırıw menen birge ishki turizmdi rawajlandırıwǵa da úles qosqan bolamız.
Jas sayaxatshılarǵa Mizdaxqan tariyxıy kompleksi aymaǵındaǵı arxitekturalıq estelikler menen olardıń tariyxı tolıq aytıp berildi. 1-kurs studentleri Xojeli qalasınan unamlı tásirler menen qayttı. Olar qızıqlı maǵlıwmatlarǵa iye bolıw menen birge waqıtların mazmunlı tárizde ótkerdi.