SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Hayal-qızlarǵa ájayip bayram keypiyatı bólisildi

Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 8-mart – Xalıqaralıq hayal-qızlar kúni bayramı múnásibeti menen bayram ilájı bolıp ótti. Dáslep filial direktorı Adilbay Esimbetov sózge shıǵıp hámme hayal-qızlardı bayram menen qutlıqlap, óziniń iygilikli tileklerin bildirip ótti.
—Keyingi jıllarda mámleketimizde gender teńlikti támiyinlewge, hayal-qızlardıń huqıqların qorǵawǵa ayrıqsha itibar qaratılıp atır. Analarımız, ájapa hám sińillerimiz milletimizdiń keleshegi, olar menen turmısımız páráwan hám jáne de gózzal boladı— dedi Adilbay Esimbetov.
Bunnan soń Ózbekstan mámleketlik kórkem óner hám mádeniyat institutı Nókis filialınıń studentleri qatnasıwında koncert baǵdarlaması qoyıp berildi. Ilájǵa estradamızdıń jarqın juldızı Azizbek Aytjanov kelip, óziniń shoq qosıqları menen bárshege quwnaq keypiyat baǵıshladı.

Hámme ortaǵa shıǵıp qosıqlardı qosılıp ayttı hám oyınǵa tústi. Filialdıń er azamatları tárepinen bárshe hayal-qızlarǵa bayram sawǵaları saltanatlı túrde tapsırıldı. Sonday-aq, bir qatar belsene hayallar húrmet jarlıǵı menen sıylıqlandı. Iláj juwmaǵında olar sózge shıǵıp, óz minnetdarshılıqların bildirdi. Hámmege ájayip bayram keypiyatı bólisildi.