SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Yadı qálbimizge mórlengen ullı tulǵanı yad etip...

Búgin Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında ózbek ádebiyatınıń iri wákili, ullı sárkarda, shax hám shayır Zahiriddin Muhammed Bobur tuwılǵanınıń 541 jıllıǵına baǵıshlanǵan ádebiy keshe shólkemlestirildi. «Veterinariya hám zooinjeneriya» fakulteti tárepinen ótkerilgen usı ilájda Berdaq atındaǵı Qaraqalpaq mámleketlik universitetiniń ózbek filologiyası fakulteti assistent-oqıtıwshıları A.Bobojonov hám O.Soburov, oqıtıwshılar hám student-jaslar qatnastı.

Fakultet dekanı A.Kaniyazov óz kiris sózinde bılay dedi :— Ullı babamız Zahiriddin Muhammed Bobur sıyaqlı ullı tulǵalar tárepinen jaratılǵan shıǵarmalar óziniń mazmunı hám áhmiyeti menen qálbimizge mórlenip qalǵan. Student-jaslar olardıń ádebiy miyrasın tereń úyreniwleri ushın bizler jaqınnan járdem beriwimiz kerek.
Keshe dawamında QMU oqıtıwshıları sózge shıǵıp, Boburdıń ómiri hám dóretiwshiligi, iri mámleketlik ǵayratker sıpatında ilgeri súrgen iygilikli baslamaları haqqında bahalı maǵlıwmatlardı aytıp berdi. Ilájdıń ádebiy bóliminde Qaraqalpaq mámleketlik universitetinen kelgen qábiletli studentleri hám filialdıń student-jasları tárepinen shayırdıń rubayı hám ǵázzelleri aytıldı. Zalda jıynalǵanlar da sózge shıǵıp, óz pikirlerin bildirdi. Ullı tulǵalarımızdı yad etiwshi usı sıyaqlı ádebiy ilájlar student-jaslar qálbinde ullı babalarımızdıń esteligine húrmet sezimin asırıwda úlken áhmiyetke iye bolıp tabıladı.