Jańa jıl jańalanıwlarǵa jarasadı
Assalawma aleykum áziz watanlaslar, húrmetli professor-oqıtıwshılar hámde qádirli student-jaslar! Kózdi ashıp jumǵansha bıyılǵı jıldı da juwmaqlap, jańa jılǵa qádem qoyıw qarsańındamız.Jaqın pursatlar ishinde kirip keliw aldında turǵan jańa jıl bayramı menen sizlerdi hám siz arqalı shańaraq aǵzalarıńızdı qutlıqlaw hám qálbimdegi eń girbińsiz tileklerimdi bildiriw baxıtına miyassar bolıp atırǵanım ushın aldı menen mıń shúkirshilik bildiremen.
Elimizge kirip kiyatırǵan jańa jılda hámmeńizge saw-salamatlıq, qarday appaq arzıwlar, ullı maqsetler hám jańalanıwlar, úlken jetiskenlikler tileymen! Álbette, hár birimiz jıldıń juwmaǵında ulıwmalıq bir sholıw jasap, erisilgen nátiyjelerge quwanıshqa bólensek, jol qoyılǵan qáte-kemshiliklerden tiyisli juwmaq shıǵarıp, sabaq alamız. Ótip baratırǵan «Insan qádiri hám sapalı bilimlendiriw jılı» filialımız ushın shın mánisinde júdá bereketli hám mazmunlı jıl boldı. 2023-jıl dawamında filial jámááti tárepinen ámelge asırılǵan salmaqlı nátiyjeler jıl juwmaǵında bizdi ayrıqsha quwanıshqa bólemekte.
Atap aytqanda, usı oqıw jılında bakalavriat bilimlendiriw baǵdarında 2 jańa qánigelik ashılıp, házirgi kúnde studentlerdiń sanı 1231 ge jetkenligi bizler ushın quwanıshlı jaǵday boldı. (Sonnan, bakalavr kúndizgi - 971, sırtqı – 243 hám magistlar 17). Óz ornında professor-oqıtıwshılarımızdıń da sanı artıp barmaqta. Jámáátimiz pedagoglarınıń ilimiy potenciyalın asırıwda islenip atırǵan háreketler nátiyjesinde bıyıl 3 oqıtıwshımız filosofiya doktorı (PhD) dissertaciyaların tabıslı jaqladı. Sonday-aq, usı jıldıń ózinde professor-oqıtıwshılarımız avtorlıǵındaǵı 1 sabaqlıq, 6 oqıw qollanba, bunnan basqa 9 oqıw qollanba hám ilimiy-izertlew jumısları boyınsha 4 monografiya baspadan shıqtı. Olar tárepinen «Web of Science», «Scopus», «Google Scholar» bazalarına kirgizilgen hám impakt faktorlı xalıqaralıq ilmiy jurnallarda 113, Respublika ilimiy jurnallarda 67 maqalalar baspadan shıǵarıldı. 7 professor-oqıtıwshımız Qazaq milliy agrar izertlew universiteti ilimpazları hám Ózbekstan ilimler akademiyası ilimpazları menen birgelikte patentler alıwǵa eristi.
Studentlerge sapalı bilim beriwge ayrıqsha itibar qaratılıp, filialǵa zamanagóy laboratoriya ásbap-úskeneleri keltirildi. Atap aytıp ótetuǵın bolsaq, "Islam rawajlanıw banki" esabınan "Biologiya" oqıw laboratoriyası ushın 20 atamadaǵı 42 sandaǵı laboratoriya inventarları hám ásbap-úskeneleri alıp kelip ornatıldı. Sonday-aq, ÓzR VShRK qollap-quwatlawı menen Ózbekstan Respublikasında Germaniyanıń xalıqralıq birge islesiw shólkemi (GIZ) nen 16 atamada 102 dana laboratoriya úskeneleri alıp kelindi. Bul studentler ózleriniń ámeliy bilimlerin bekkemlewde álbette úlken xızmet atqaradı. Filialdıń ilimiy baǵdardaǵı jetiskenliklerin jáne de arttırıw, studentlerge sırt el tájiriybeleri tiykarında bilimlerdi berip barıw maqsetinde sırt eldiń abıraylı oqıw orınları menen shártnamalar dúziwge eristik. Mısalı, GermaniyanıńVayenshtefan-Trizdorf ámeliy ilimler universiteti (HSWT) menen student almasıwın jolǵa qoyıw, paydalı joybardı ámelge asırıw, ilimiy-izertlewler tarawında birge islesiw mexanizmleri boyınsha memorandum imzaladıq. Qazaqstan hám Qırǵızstan Respublikalarınan professorlardıń kelip filial studentlerine sabaq ótiwi bilimlendiriw sapasın jaqsılaw ushın usı jıldıń ózinde ámelge asırıldı. Studentlerdi tiyisli oqıw-sabaqlıqları menen támiyinlewge de ayrıqsha itibar qaratılıp, Málimleme resurs orayınıń ulıwma fondı 8030 nusqada bayıtılıp, sabaqlıqlar 4530, oqıw ádebiyatlar hám oqıw qollanbalar 1842, kórkem ádebiyatlar sanı 2452 ge toltırılıp, 2023-2024 oqıw jılı ushın tiykarǵı ádebiyatlar menen támiyinlew dárejesi 85 % ti quradı. Studentler ushın jańadan elektron kitapxana xanası ajıratıldı hám kerekli texnikalar menen támiyinlendi. Olar bos waqıtlarında filial kitapxanasında ótkerip, biymálel ózleriniń bilimlerin bekkemlewi ushın tolıq múmkinshilik jaratıp berildi.
Ruwxıylıq hám aǵartıwshılıq baǵdarında da kóplegen jumıslar ámelge asırılıp, unamlı nátiyjelerge eristik. Atap aytatuǵın bolsaq, jaz ayında “Jańa Ózbekstan jasları, birleseyik!” súreni tiykarında ótkerilgen “Studentler báhári” festivalı sheńberinde bir qatar ilájlar hám tańlawlarda Respublikamızdaǵı Joqarı oqıw orınları arasında sıylı orınlardı alıp, Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen diplom hám bahalı sawǵalar menen sıylıqlandıq. Sport tarawında da maqtanısh penen ayta alatuǵın nátiyjelerimiz boldı. Usı jıldıń 8-11-dekabr kúnleri aralıǵında Qazaqstan Respublikası Shımkent qalasında bolıp ótken Aziya kubogında 3-kurs student qızımız K.Serimbetova sıylı 1-orındı alıp, altın medal iyesi boldı.
Studentlerimizdiń jetiskenlikleri arasında eń quwanıshlı jańalıǵımız bıyıl filial tariyxında 4-kurs student qızımız birinshi márte Ózbekstan Respublikası Prezidenti stipendiyası jeńimpazı bolıwǵa miyassar boldı. Jámi 4 studentimiz Prezident ham ataqlı mámleketlik stipendiya jeńimpazı boldı.
Álbette, joqarıda atap ótilgen jetiskenliklerdiń barlıǵın keń jámáátshilikke qalıs hám operativ túrde jetkerip barıwda da belsendilik kórsetip kelmektemiz. Filialımızdıń Málimleme xızmeti tárepinen televidenie, gazeta, radio hám belgili veb-saytlarda filial turmısına baylanıslı kóplegen maqalalar jarıq kórdi. Joqarı bilimlendiriw, ilim hám innovaciyalar ministrliginiń rásmiy telegram kanalı https://t.me/eduuz arqalı “Qarekeńshe onlayn” komandası menen birgelikte sapalı hám kreativ roliklerdi jarıtıp bardı. Mine usınday miynetleri, tırısqaqlıǵı hám belsendiligi nátiyjesinde Málimleme xızmeti basshısı Ziywar Xojamuratova usı jıldıń 27-iyun sánesinde Baspasóz hám ǵalaba xabar quralları xızmetkerleri kúnine baǵıshlap ótkerilgen saltanatlı ilájda Qaraqalpaqstan Respublikası Joqarǵı Keńesiniń Baslıǵı Amanbay Orınbaev tárepinen bahalı sawǵa menen sıylıqlandı.
Men ózimde filial basshısı retinde usı dárgaydıń ilimiy darejesi artıwı ushın jámááttiń qollap-quwatlawı astında ózimniń azǵana úlesimdi qosa aldım, yaǵnıy professor ilimiy ataǵın alıwǵa miyassar boldım. Sonıń menen filialda professorlardıń sanı 2 ge jetti. Úlken jetiskenliklerge hám mol-molaqay tabıslarǵa bay bolǵan 2023- jılǵa minnetdarshılıǵım sheksiz. Men jetiskenliklerimizdiń dizimin ele júda kóp dawam etiwim múmkin. Jıl juwmaǵında filial jámááti hám studentler menen birgelikte erisken nátiyjelerimizge usınday qısqa túrde sholıw jasap ótiwdi ózime maqul dep bildim hám quwanıshımdı sizler menen bóliskim keldi. Eń tiykarǵısı filial jámááti úlken tabıslarǵa qaray awızbirshilik penen batıl qádemlerdi taslap adımlap barmaqta. Ullı maqsetimiz bolsa, jas qánigelerge joqarı sapalı hám jetik bilim beriw ekenligin hár saparı tákirarlawdan sharshamayman.
Áziz watanlaslar, qádirli filial jámááti hámde student-jaslar bársheńizdi jáne bir márte ájayibatlar bayramı bolǵan jańa jıl menen pozitiv keypiyatta qutlıqlayman. Hár birińizge saw-salamatlıq, shańaraǵıńızǵa bereket hám ullı maqsetlerińizdi ámelge asırıwda kúsh-ǵayrat hám sabır tileymen. Gózlegen mánzilińizge nıq qádemler menen jetip barıwıńızdı, kewil qáterjamlıǵı, ájayip jańalanıwlar hám qálb pákligin tileymen. Baxıt ıǵbalıńız hámiyshe kúlip turıwın, nesibeńiz mol-molaqay bolıwın, baslaǵan uzın jolıńızda sizge tek ǵana jaqsılıqlar joldas bolıwın tileymen. Ilayim, elimizge kirip kiyatırǵan jańa 2024-jıl gúllan xalqımız ushın qutlı hám payızlı bolp kelsin. Usınday ájayip bayramdı shańaraq aǵzalarıńız hám jaqın-juwıqlarıńız benen tolı dasturxan basında kútip alıw bárshemizge nesip etkey. Bárshe-bársheńizge haqıyqıy bayram keypiyatın tilep qalaman. Jańa jılıńız benen!
Húrmet penen, filial direktorı,
Biologiya ilimleri doktorı,
professor Esimbetov Adilbay Tlepovich
скачать dle 12.1
Telefon
E-mail
