SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

«Ádillik qanatları» komandası «Jaslar hám nızam» tańlawında belsene qatnastı

Búgin student-jaslardıń huqıqıy sanası hám huqıqıy mádeniyatın jetilistirip barıw, nızam ústemligin támiyinlew, olardı nızam hújjetlerine húrmet ruwxında tarbiyalaw hám sol arqalı student-jaslardıń siyasıy belseneligin asırıw sonıń menen birge bos waqıtların mazmunlı ótkeriwi ushın sharayat jaratıw maqsetinde respublikamızdaǵı joqarı oqıw orınları arasında Jaslar awqamı Qaraqalpaqstan Respublikası Keńesi baslaması menen «Biz jaslar huqıqbuzarlıq hám jınayatshılıqqa qarsımız» súreni tiykarında «Jaslar hám nızam» tańlawı bolıp ótti.
Usı tańlawǵa Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń student-jaslarınan dúzilgen «Ádillik qanatları» komandası Málimleme xızmeti basshısı Z.Xojamuratova, jaslar jetekshisi B.Xojabergenov hám tyutor B.Iskakov basshılıǵında belsene qatnastı.
Jámi 3 shárt tiykarında ótkerilgen jarıs qızıqlı hám zawıqqa bay tárizde ótti. Hár bir komanda óziniń huqıqıy sawatlılıǵın hám qábiletlerin kórsetip beriwge tırıstı.
Ásirese 3-mashqala hám sheshim shártinde filial studentleri tárepinen qoyıp berilgen sahnalıq kórinis, atqarıwshılıq sheberligi tóreshiler hám tamashagóylerdiń kewilinen ayrıqsha orın aldı hám alǵıslarǵa miyassar boldı.
Tańlaw juwmaǵında «Ádillik qanatları» komandası belsene qatnasqanlıǵı ushın diplom hám estelik sawǵaları menen sıylıqlandı.