Direktor minnetdarshılıǵı
Assalawma áleykum, filial jámááti, professor-oqıtıwshılar hám student-jaslar!
Usı jıldıń 1-iyun'nen 4-iyun kúnleri aralıǵında Respublikamızdaǵı joqarı oqıw orınları arasında “Jańa Ózbekstan jasları, birleseyik” súreni tiykarında «Studentler báhári» festivalı bolıp ótti. Festival sheńberinde kóplegen ilájlar hám kórik-tańlawlar, sport jarısları ótkerildi.
— Atap ótiw orınlı, filialımızda da usı sıyaqlı bir qatar ilájlar joqarı dárejede shólkemlestirildi. Álbette, usınday sheber shólkemlestiriwshilik jumıslarında pútkil filial jámááti, atap aytqanda, professor-oqıtıwshılar, dekanat, barlıq bólimler hám tyutorlar, solar qatarında Jaslar menen islesiw, ruwxıylıq hám aǵartıwshılıq bólimi hámde Málimleme xızmeti, sonday-aq tırısqaq hám qábiletli studentlerimizdiń awızbirshilik penen ámelge asırǵan isleri hám miynetlerin ayrıqsha atap ótiw menen birge bulardıń hár birine ózimniń tereń minnetdarshılıǵımdı bildiremen.
Pútkil student-jaslardı birlestirgen festivaldıń joqarı dárejedegi shólkemlestiriwshilik penen bolıp ótiwine Samarqand mámleketlik veterinariya medicinası, sharwashılıq hám biotexnologiyalar universiteti Nókis filialınıń múnásip úlesin qosıwında filial jámáátiniń awızbirshilik penen, iygilikli maqset jolında jámlese alǵanlıǵı girewli boldı dep oylayman. Qalaberse, JOOları studentleri arasında ótkerilgen qatar tańlawlar hám sport jarıslarında filial studentleriniń unamlı nátiyjelerdi qolǵa kirgizip, jeńimpazlar sanınıń ádewir kóbeygenligi, bizdi ayrıqsha quwanıshqa bóledi.
Usı orında bunday joqarı nátiyjelerge erisiwimizde óziniń salmaqlı úlesin qosqan studentler, atap aytqanda, «Debat» intellektual oyınında komanda bolıp, sıylı 1-orındı iyelegen studentlerge, er balalar arasında sporttıń kishi futbol túri boyınsha 2-orındı iyelegen hám qızlar arasında sporttıń voleybol túrinen 3-orındı qolǵa kirgizgen saylandı komandamızdıń jigit-qızlarına, Studentler teatr studiyasındaǵı qábiletli studentlerimizge, "Zamanagóy ayaq oyın" tańlawında jeke shıǵıwda sıylı 1-orındı iyelewge miyassar bolǵan 2-kurs studenti Aziza Medetbaeva hám 2-orındı iyelegen 1-kurs studenti Malika Polatbaeva, “Jas baqsılar" tańlawında jas sázende jónelisi boyınsha 2-orın iyesi bolǵan Aqsungul Dosekeeva hám usı tańlawlarda belsene qatnasıp, filialdıń abıroyın kóteriw ushın múnásip háreket qılǵan barlıq student-jaslarǵa ózimniń minnetdarshılıǵımdı bildirip qalaman.
Awızbirshilikte ámelge asırılǵan istiń óz aldına bereketi boladı, onıń juwmaǵında qolǵa kirgizilgen nátiyjeler bolsa, bizge jańa motivaciya hám qáterjamlıq baǵıshlaydı. Biz birgelikte háreket qıldıq hám «Studentler báhári» festivalınıń hár birimizdiń qálbimizde unamlı elesler menen mórleniwine erise aldıq. Aldaǵı waqıtta da usınday joqarı nátiyjelerdi qolǵa kirgizip júriw nesip etiwin tilegen halda, hár birińizge tereń salamatlıq hám iygilikli arzıw-maqsetlerińizdi ámelge asırıwda sabır-qanaat hám energiya tileymen. Hár dayım aǵla pazıyletler joldasıńız bolsın!
Húrmet penen,
Esimbetov Adilbay Tlepovich
SamMVMShBU Nókis filialınıń direktorı
скачать dle 12.1
Telefon
E-mail
