SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

Professor-oqıtıwshılar hám xızmetkerlerdiń arasında “Biz-sportshı shańaraqpız” jarısı ótkerildi

Hár jılı 15 may sánesi –Xalıqaralıq shańaraq kúni sıpatındla belgilenip kelinbekte. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında usı sáne múnásibeti menen filial kásiplik awqamı tárepinen “Biz-sportshı shańaraqpız” súreni tiykarında professor-oqıtıwshılar hám xızmetkerlerdiń shańaraǵı qatnasıwında sport jarısı ótkerildi. Ilajdı Jaslar menen islesiw, ruwxıylıq hám aǵartıwshılıq bólimi baslıǵı A.Seytkamalov, Jaslar menen islesiw boyınsha dekan orınbasarı E.Seytmuratov hám kásiplik awqamı komiteti baslıǵı G.Kazaxbaeva ashıp berdi hám barlıq komandaǵa áwmetler tiledi.

Filial oqıtıwshıları hám xızmetkerlerdi ǵalabalıq sportqa qamtıw, salamat turmıs tárizin keń túrde úgit-násiyat qılǵan halda, paydalı shınıǵıwlar menen shuǵıllandırıw arqalı ózi hám shańaraq aǵzalarınıń salamatlıǵın bekkemlew sıyaqlı iygilikli maqset astında ótkerilgen usı jarısta kafedra oqıtıwshıları hám xızmetkerlerdiń shańaraǵınan jámi 6 komanda qatnastı. Qatnasıwshılar túrli qızıqlı sport shınıǵıwların óz ishine qamtıp alǵan 7 shárt boyınsha bellesti. Ekonomika hám gumanitar pánler kafedrasınıń dene tárbiya oqıtıwshısı Q.Urazbaev jarısqa tóreshilik qılıp bardı.

Hár bir komanda shaqqanlıq hám epshillik penen háreket qılıp, jeńimpaz bolıwǵa umtıldı. Shańaraq aǵzaları awızbirshilikte bir komanda bolıp shártlerdi jaqsı orınlawǵa tırıstı. Qızıqlı hám pozitiv tárizde bolıp ótken jarıs óz juwmaǵına jetkennen soń, jeńimpazlardı sıylıqlaw máresimi bolıp ótti. Onda filial direktorı Adilbay Esimbetov sózge shıǵıp, jıynalǵanlardı jaqınlasıp kiyatırǵan Xalıqaralıq shańaraq kúni múnásibeti menen qızǵın qutlıqlap, óz tileklerin bildirdi. Juwmaqlawshı nátiyjelerge kóre, 3-orın tyutor qatnasıwındaǵı Xojambergenovlar shańaraǵına nesip etken bolsa, 2-orındı filial psixologınıń shańaraq aǵzaları Bekniyazovlar iyeledi. Haywanlar anatomiyası, fiziologiyası hám bioximiyası kafedrasınıń atınan qatnasqan Primbetovlar shańaraǵı 1-orındı iyelep, jarıs jeńimpazına aylandı. Bul jeńimpaz komandalarǵa shólkemlestiriwshiler tárepinen tayarlanǵan diplom hám bahalı sawǵalar tapsırıldı. Qızǵın bellesiwlerge bay tárizde ótken jarıs qatnasıwshılarǵa pozitiv keypiyat baǵıshladı.