SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI NUKUS FILIALI

9 may –eslew hám qádirlew kúni múnásibeti menen nuranıy atanıń halınan xabar alındı

Hár jılı elimizde 9 may –eslew hám qádirlew kúni keń túrde belgilenip, Ekinshi jer júzilik urıs maydanında elimiz tınıshlıǵı ushın gúresip, qaytıs bolǵan watanlaslarımız yadqa alınıp, húrmet kórsetiledi. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında 9 may–eslew hám qádirlew kúni qarsańında Ekinshi jer júzilik urıs qatnasıwshıları hám miynet nuraniylarınıń halınan xabar alıw jaqsı úrdiske aylanǵan. Búgin filial jámááti hám student-jaslar direktor Adilbay Esimbetov basshılıǵında I-dárejeli «Mehnat faxriysi» kókirek belgisiniń iyesi, Ózbekstan Respublikasına xızmet kórsetken sharwa xızmetkeri, Qaraqalpaqstan Respublikasına miyneti sińgen ilim ǵayratkeri Buxarbay aǵa Ábdirovtıń úyine barıp, nuranıy atanıń halınan xabar alındı. Dáslep, A.Esimbetov 95 jastı qarsı alǵan atamızdı Ekinshi jer júzilik urısta erisilgen jeńistiń 78 jıllıǵı menen qızǵın qutılqlap, kókiregine lenta taǵıp qoydı. Bunnan soń úy iyesine sawǵalar tapsırılıp, iygilikli tilekler bildirildi.

Buxarbay aǵa Ábdirov student-jaslarǵa óziniń basıp ótken mashaqatlı ómir hám miynet jolı, turmıslıq tájiriybeleri, ilim jolında alıp barǵan iskerligi, haqqında keń túrde aytıp berdi hám qıyınshılıqlarǵa tózim berip, baxıt hám ıǵbalǵa erisiw múmkin ekenligi tuwralı óziniń bahalı úgit-násiyatın berip ótti. Mazmunlı sáwbetlesiwden soń miynet nuranıyı qolın pátiyaǵa jayıp, elimiz tınısh hám turmısımız abat bolıwın tilep, jaslarǵa pátiyasın berdi. Teberik jastaǵı atanıń halınan xabar alıwdan gózlengen baslı maqset onı ayrıqsha húrmetke bólep, jaslarǵa pátiyasın alıp beriw hám usınday sawaplı hám iygilikli islerde studentlerge órnek bolıw bolıp esaplanadı.

Mámleketimizde búgingi kúnde urıs qatnasıwshıları hám miynet nuranıylarına ayrıqsha ǵamqorlıq kórsetilip, húrmet hám itibarǵa bólenip atırǵanlıǵı jaslar qálbinde watansúyiwshilik sezimlerin jáne de kúsheytiwde girewli orın tutadı. Student-jaslar menen birgelikte eslew hám qádirlew kúni qarsańında ámelge asırılǵan nuranıy atanıń halınan xabar alıw ilajı bárshege unamlı keypiyat baǵıshladı.